Vill kaupa hlut í körfuboltaliði

Popparinn og leikarinn Justin Timberlake verður hugsanlega einn af eigendum NBA-körfuboltaliðsins Memphis Grizzlies.

Væntanlegur eigandi félagsins, Robert Pera, hefur viðurkennt að Timberlake hafi áhuga á að kaupa með sér hlut í félaginu.

Sexy Back-söngvarinn fæddist í Memphis og hefur verið duglegur við að fara á NBA-leiki víða um Bandaríkin í gegnum árin svo eftir hefur verið tekið.

Líklegt er að núverandi eigandi Grizzlies, Michael Heisley, ætli að selja hinum 34 ára Pera og fleiri fjárfestum meirihlutann í liðinu.

Einn þeirra er Timberlake, sem er góður vinur Pera. Fregnir herma að popparinn ætli að taka virkan þátt í rekstri liðsins, enda hefur hann mikinn áhuga á öllu sem viðkemur slíkum rekstri.

Timberlake er annars þessa dagana að leika í myndinni Runner, Runner á móti Ben Affleck og Gemmu Arterton. Leikstjóri er Brad Furman sem síðast gerði The Lincoln Lawyer.

Myndin er væntanleg í bíó á næsta ári.