Pistorius setti heimsmet í fyrsta hlaupi á ÓL fatlaðra

Suður-Afríkumaðurinn Oscar Pistorius setti heimsmet í kvöld þegar hann tryggði sér sæti í úrslitahlaupinu í 200 metra hlaupi í sínum flokki á Ólympíumóti fatlaðra í London. Pistorius hleypur eins og kunnugt er á gervifótum frá Össuri.

Oscar Pistorius vann þrjú ÓL-gull á mótinu í Peking fyrir fjórum árum og það er því óhætt að segja að titilvörnin byrji vel. „Ég veit ekki hvort ég vinni eins mörg gull og í Peking en það er frábært að setja heimsmet í fyrsta hlaupi," sagði Oscar Pistorius eftir hlaupið í kvöld.

Hann hljóp 200 metrana í kvöld á 21,30 sekúndum og bætti nokkurra mínútna gamalt heimsmet Brasilíumannsins Alan Fonteles Cardoso Oliveira sem hafði hlaupið í riðlinum á undan.

„Ég ætlaði bara að reyna að ná góðu hlaupi. Ég er svo ánægður að vera hér og ég er mjög ánægður með tímann hjá mér. Á morgun er síðan stóra hlaupið og ég hlakka til," sagði Pistorius.

Pistorius varð fyrir nokkrum vikum fyrsti fótalausi maðurinn til þess að keppa á Ólympíuleikunum. Pistorius komst í undanúrslit í 400 metra hlaupi á ÓL í London og fór í úrslit með Suður-afrísku sveitinni í 4 x 400 metra hlaupi.