Kirdyapkin labbaði í mark á nýju Ólympíumeti

Rússinn Sergey Kirdyapkin tryggði sér í dag sigur í 50 kílómetra göngu karla á Ólympíuleikunum í London. Kirdyapkin hefur tvisvar unnið heimsmeistaratitilinn í 50 km göngu en nú kom fyrsta Ólympíugullið hans í hús. Kirdyapkin tókst ekki að klára gönguna á leikunum fyrir fjórum árum en fékk nú uppreisn æru.

Sergey Kirdyapkin kom í mark á þremur klukkutímum 35 mínútum og 59 sekúndum og bætti gamla Ólympíumetið um rúma mínútu. Kirdyapkin var 54 sekúndum á undan Ástralanum Jared Tallent sem var einnig undir gamla metinu og hlaut silfur. Bronsið fór síðan til Si Tianfeng frá Kína.

Jared Tallent var að vinna silfur á öðrum leikunum í röð en eiginkona hans, Claire, mun síðan keppa í 20 km göngu kvenna seinna í dag.

Hinn 32 ára gamli Kirdyapkin var sigurstranglegur fyrir keppnina ásamt löndum sínum Igor Erokhin og Sergey Bakulin eftir að Ólympíumeistarinn frá því í Peking 2008, Ítalinn Alex Schwazer, féll á lyfjaprófi. Schwazer átti einmitt gamla Ólympíumetið. Kirdyapkin var hinsvegar sá eini af þeim sem stóðs pressuna.