Sturridge sendi Úrúgvæja heim | Bretar mæta Suður-Kóreu

Daniel Sturridge, leikmaður Chelsea, tryggði Bretum 1-0 sigur á Úrúgvæ í lokaumferð riðlakeppni knattpyrnukeppni karla á Ólympíuleikunum í London í kvöld.

Með sigrinum tryggðu Bretar sér efsta sæti A-riðils en Úrúgvæjar, sem fengu nóg af færum í Cardiff, sitja eftir með sárt ennið.

Senegal og Sameinuðu arabísku furstadæmin gerðu 1-1 jafntefli í hinum leiknum. Senegalar fara áfram í öðru sæti riðilsins.

Fyrr í dag tryggði Mexíkó sér sigur í B-riðli eftir 1-0 sigur á Sviss. Suður-Kórea gerði markalaust jafntefli gegn Gabon sem var nóg til þess að komast áfram.

Brasilíumenn lögðu Nýja-Sjáland 3-0 í lokaumferð C-riðils dag og luku riðlakeppninni með fullt hús stiga. Egyptar fylgja þeim í átta liða úrslitin eftir 3-1 sigur á Hvíta-Rússlandi.

Þá tryggði Japan sér sigur í D-riðli með markalausu jafntefli gegn Hondúras en jafntefli voru úrslit sem hentuðu báðum liðum.

Spánn og Marokkó gerðu einnig markalaust jafntefli í leik sem fyrir vikið hafði litla þýðingu.

Í átta liða úrslitum mætast:

Bretar - Suður-Kórea

Brasilía - Hondúras

Mexíkó - Senegal

Japan - Egyptaland