Leik frestað á U.S. Open

Ekki er vitað á þessari stundu hversu lengi frestunin stendur yfir en fyrstu ráshópar voru farnir af stað í sína hringi. Nú hafa þeir verið beðnir um að yfirgefa völlinn og er von á frekari upplýsingum klukkan korter yfir tólf að íslenskum tíma.

Gunnlaugur Árni Sveinsson á að hefja sinn hring rétt fyrir klukkan hálf sjö í kvöld en nú þykir nokkuð ljóst að hann muni fara seinna af stað í sinn hring. Sigmundur Einar Másson, þjálfari í teymi Gunnlaugs á mótinu er mættur á Shinnecock völlinn í New York fylki og sendi meðfylgjandi mynd á fréttastofu. 

Búist var við því að veður gæti sett strik í reikninginn á mótinu, en þá aðallega hvað varðar vindstyrk. Þokan kemur mönnum kannski örlítið á óvart. 

Hvað vindinn varðar gætu það verið góðar fréttir fyrir þá sem eiga teig seint, eins og Gunnlaugur Árni, að fara seinna af stað en áætlað var. Þar með gæti versti vindurinn verið dottinn niður. 

Veðurspáin fyrir daginn gæti verið betri. Spáð er einhverri rigningu fyrri part dags og svo á að hvessa eftir því sem líður á daginn.

Bein útsending frá fyrsta keppnisdegi U.S. Open hefst klukkan fjögur í dag á Sýn Sport.