Þormóður: Eins og að lenda fyrir bíl

Þormóður Jónsson féll úr leik á Ólympíuleikunum í London í morgun eftir að hafa tapað fyrir Rafael Silva frá Brasilíu í 32-liða úrslitum +100kg.

Silva vann fullnaðarsigur eftir eina mínútu og 48 sekúndur en hann er þriðji á heimslista og ríkjandi Ameríkumeistari í greininni. Þormóður reyndi að verjast eins vel og hann gat en þegar sigurbragðið kom var hann varnarlaus.

„Við vissum að hann myndi koma þarna yfir með hægri höndina. Ég reyndi að stoppa það og gekk það eftir í smá tíma. Svo náði hann að festa hana og þá var þetta orðið mjög erfitt."

„Svo kom sóknin og þetta var bara óverjandi. Hann náði hnénu á mér og ef ég hefði reynt að standa þetta af mér þá hefði það bara farið," sagði Þormóður.

„Hann setti mig næstum í gegnum gólfið. Maður er ekki oft felldur svona.

Þormóður mætti Silva á móti í Varsjá í fyrra og var það allt öðruvísi glíma, segir Þormóður. Silva vann þó á ippon þá.

„Það var mun seinna í mótinu. Þá var hann aðeins linari en í dag kom hann greinilega mjög ákveðinn til leiks. Ég fílaði mig samt ágætlega og var sprækur. Vandamálið var ekki að hann væri sterkur og stór heldur að hann náði að gera það sem hann vildi gera."

„Ég reyndi að stoppa það en það tókst ekki. Ég er ánægður með að ég var með rétt „gameplan" en ég náði bara ekki að framfylgja því."

Þormóður var búinn að segja að hann þyrfti að varast hægri höndina hjá Silva. Hún reyndist lykilatriði í dag. „Ég náði að stoppa hana lengi vel en svo komu 1-2 skipti þar sem það tókst ekki, þó svo að ég hafi verið með báðar mínar hendur á henni. Hann er svo sterkur að hann hélt bara gripinu."

„Svo kemur hann inn og það er svakaleg tækni á bak við bragðið sem hann framkvæmdi. Það verður svo sterkt að þetta var eins og að lenda fyrir bíl."

Þormóður þekkir vel að glíma við bestu júdómenn heims og það var því ekkert nýtt fyrir honum í dag. „Þessi er til dæmis miklu betri en báðir þeir sem ég mætti í Peking fyrir fjórum árum síðan. Ég var með markmið um að komast í átta manna úrslit en ég á von á því að þessi maður verði í topp fimm á mótinu - þó maður viti aldrei hvað gerist."

Þormóður segir að þó svo að átökin hafi verið mikil hafi hann átt meira inni. „Ég var ekki orðinn þreyttur. Hann er bara hraustur og góður maður sem erfitt er að eiga við. Það er engin tilviljun að hann sé númer þrjú í heiminum."

Hann segist ekki vita hvað taki við hjá sér. „Nú fer ég heim og tek á móti syni mínum sem á að koma í heiminn hvað á hverju. Ég einbeiti mér að því og svo sjáum við hvað setur."