Latibær á 100 milljón heimilum

„Þetta er algjörlega frábært,“ segir Guðmundur Magnason hjá Latabæ.

Latibær er kominn inn á nánast hvert einasta heimili í Bandaríkjunum, eða rúmlega hundrað milljónir heimila, í gegnum sjónvarpsrisann NBC. Þættirnir eru sýndir á stöðinni NBC Kids á hverjum laugardagsmorgni. Þeir eru einnig sýndir tvisvar á dag á barnastöðinni Sprout, sem nær til um fjörutíu milljóna heimila, og á spænskumælandi stöðinni Telemundo tvisvar í viku.

Að sögn Guðmundar er eftir miklu að slægjast á Bandaríkjamarkaði varðandi sölu á Latabæjar-varningi. Að sama skapi er þetta langerfiðasti markaðurinn að komast á. „Við sömdum við sjónvarpsstöðina PBS Sprout sem er að stærstum hluta í eigu Comcast. Svo kaupir Comcast NBC Universal fyrir nokkru síðan og í framhaldi af því taka þeir við þessari „krakkablokk“ frá NBC,“ segir hann. „Þetta er hluti af stærra plani hjá okkur sem gengur út á að koma Latabæ að með vörur í öllum helstu vöruflokkum. Þangað erum við að fara.“

Til að það takist er allt reynt til að vekja athygli á Latabæ úti um öll Bandaríkin. Sjónvarpið hjálpar þar mikið til en einnig er að fara af stað Latabæjarleikrit, auk þess sem Latabæjarhópur mun kynna vörumerkið með uppákomum í fjörutíu verslunarmiðstöðvum. Auglýsingar íþróttaálfsins með forsetafrúnni Michelle Obama hafa einnig hjálpað mikið til að við vekja athygli á Latabæ vestanhafs. -fb