Tottenham staðfestir komu Gylfa

Tottenham hefur staðfest komu Gylfa Þórs Sigurðssonar til félagsins. Frétt birtist þess efnis birtist á heimasíðu þess í dag.

Í fréttinni segir að Tottenham hafi gengið við samkomulagi við Hoffenheim um kaup á Gylfa en ekki kemur fram hversu langur samningurinn er.

Þetta hefur legið í loftinu síðustu daga en í gær var gengið frá ráðningu Andre Villas-Boas í stöðu knattspyrnustjóra félagsins. Gylfi er því fyrsti leikmaðurinn sem kemur til félagsins eftir ráðningu hans.

Gylfi lék sem lánsmaður hjá Swansea á síðari hluta síðasta tímabils en hann var samningsbundinn Hoffenheim til 2014. Brendan Rodgers, sem fékk hann til Swansea um áramótin, var ráðinn til Liverpool í vor og vildi fá Gylfa þangað.

Gylfi valdi hins vegar á endanum að ganga til liðs við Lundúnarfélagið Tottenham, sem hafnaði í fjórða sæti ensku úrvalsdeildarinnar á síðustu leiktíð.

Ekki kemur fram hvað Tottenham greiðir fyrir Gylfa en Swansea hafði áður boðið 6,8 milljónir punda, um 1,3 milljarða króna, í kappann. Fréttavefur Morgunblaðsins segir kaupverðið vera átta milljónir punda - um 1,6 milljarðar króna.