Jónas Sigurðsson og Valdimar í Austurbæ í kvöld

Það verða þrusutónleikar í Austurbæ í kvöld. Stuðsveitirnar Jónas Sigurðsson og Ritvélar framtíðarinnar og Valdimar halda tónleika og flytja lög af nýju plötunum sínum, Allt er eitthvað og Undraland.

Meðal hápunkta kvöldsins verður án efa þegar Jónas slær í lagið Hamingjan er hér, sem var valið besta lag ársins á Íslensku tónlistarverðlaununum um daginn. Þar var einnig platan Allt er eitthvað tilnefnd sem plata ársins og Jónas tilnefndur sem textahöfundur ársins.

Hljómsveitin Valdimar er síðan nýtt afl í íslensku tónlistarsenunni. Margir kannast eflaust við lagið Brotlentur (hægt er að sjá myndbandið við það hér að ofan), en það hefur notið mikilla vinsælda síðustu mánuði. Sveitin var tilnefnd sem bjartasta vonin á tónlistarverðlaununum og platan Undraland lenti ofarlega á mörgum listum yfir bestu plötur ársins 2010. Hljómsveitin Valdimar þykir einnig geisla af útgeislun og krafti á tónleikum, rétt eins og Jónas Sigurðsson og Ritvélar framtíðarinnar.

Tónleikarnir hefjast klukkan 21 í Austurbæ. Miðaverð er 1500 krónur í forsölu á midi.is og 2000 krónur við hurð.