Eigum ekki 300 milljónir

„Þetta var skemmtileg hugmynd en þegar maður fór yfir málin og skoðaði það af alvöru þá var þetta ekki fyrir okkur. Þar að auki eigum við engar 300 milljónir," segir Sigmar Vilhjálmsson.

Í lok apríl kvissaðist það út að tvíeykið Simmi og Jói hyggðust gera tilboð í flatbökufyrirtækið Pizza-Pizza, umboðsaðila Dominos, sem Landsbankinn tók yfir vegna skuldsetningar. Simmi og Jói hafa rekið veitingastaðinn Hamborgarafabrikkuna sem notið hefur mikillar hylli ásamt Skúla Gunnari Sigfússyni og Sigmar neitaði þessum orðrómi ekki í samtali við Vísi. „Það eru sennilega allir í veitingabransanum að skoða þetta," hafði Vísir eftir honum.

Sigmar bendir á að hann og Jói séu varla komnir af bleyjuskeiðinu í veitingahúsareksti, þeir séu bara eins árs gamlir og hafi ekki neina heimsyfirráðarstefnu að leiðarljósi; þeir séu ekki einu sinni að íhuga að opna aðra Fabrikku þrátt fyrir miklar vinsældir.

„Okkur þykir bara gaman að reka þennan eina stað og það myndi kosta mikla vinnu að fara endurskapa þessa stemningu annar staðar," segir Sigmar. Hann mun þó, eftir sem áður, verða nátengdur Dominos því hann er rödd fyrirtæksins í auglýsingum. Samkvæmt heimasíðu Landsbankans er ráðgert að sölunni á Dominos ljúki í júlí en óskuldbindandi tilboðum skal skila fyrir klukkan 12 fimmtudaginn 9.júní.- fgg