Hreimurinn varð Cole að falli

Breska poppstjarnan Cheryl Cole hefur verið rekin úr bandarísku útgáfunni af X-Factor. Ástæðan er talin sú að framleiðendur þáttarins óttuðust að bandarískir sjónvarpsáhorfendur myndu ekki skilja sterkan Newcastle-hreim hennar. Áheyrnarprufur fyrir þáttinn hafa staðið yfir að undanförnu.

Tvær aðrar ástæður fyrir brotthvarfinu hafa verið nefndar, eða þær að Cheryl hafi hætt sjálf vegna heimþrár og að hún og Paula Abdul, einn af fjórum dómurum þáttarins, hafi ekki náð vel saman.

Þegar Cole var spurð út í hreiminn á fyrsta degi sínum sem dómari óttaðist hún ekki að fólk myndi ekki skilja hana. „Bandaríkjamenn eiga alltaf eftir að skilja mig," sagði hún.

Nicole Scherzinger, fyrrverandi söngkona Pussycat Dolls, mun fylla skarð Cole en hún átti að vera annar af kynnum keppninnar. Hún verður því dómari við hlið þeirra Paulu Abdul, Antonio L.A. Reid og Simon Cowell.

Vangaveltur um að Cole yrði einn af dómurum keppninnar höfðu staðið yfir í langan tíma og fyrr í mánuðinum var þátttaka hennar loks staðfest. Cole, sem hefur verið dómari í bresku útgáfunni af X-Factor, er komin aftur heim til Bretlands. Óvíst er hvort hún snúi aftur í bresku útgáfuna.