Íslenskir huldumenn opna hamborgarastað á Spáni

„Þeir vilja nú helst ekki láta nafns síns getið," segir Eyþór Eiríksson, sem rekur hamborgarastað í borginni Torrevieja á Spáni.

Tveir íslenskir athafnamenn hafa opnað staðinn Gourmet Burger. Þeir hafa reynslu af veitingarekstri á Íslandi en annað vildi Eyþór ekki segja blaðamanni um eigendurna. „Þetta eru Íslendingar sem sáu að þetta vantaði hér, að fá alvöru hamborgara. Þetta er réttur sem Spánverjinn kann ekki að búa til, eða Bretinn."

Staðurinn var opnaður fyrir mánuði og þar svífur andi sjöunda áratugarins yfir vötnum. Að sögn Eyþórs var mikil vinna lögð í að finna slátrara sem gat búið til alvöru hamborgara eins og við Íslendingar þekkjum með 100% nautakjöti. Ekki borgara sem bragðast eins og kjötfars eins og oft vill verða á spænskum veitingastöðum. Ferskar kjúklingabringur og steikur gerðar úr nautalundum fást einnig á Gourmet Burger, auk þess sem hin séríslenska kokkteilsósa er auðvitað á sínum stað. Hingað til hafa útlendingarnir ekki litið við henni en vonir standa til að þeir komist á bragðið með tíð og tíma.

Miðað við metnað Eyþórs og félaga í Torrevieja er ljóst að þeir ætla sér stóra hluti í framtíðinni. Hann hlær, spurður að því hvort nú sé röðin komin að hinni íslensku hamborgaraútrás í stað hinnar misheppnuðu fjármálaútrásar. „Þarna er ekki verið að plata neinn og leika sér með einhverjar tölur sem eru ekki til. Hérna fá allir sinn hamborgara á diskinn."

Auk Eyþórs starfa níu manns á Gourmet Burger, þar af fimm Íslendingar. Hann segir að viðbrögðin hafi verið góð, sérstaklega miðað við að hann er glænýr á markaðnum.

„Það þarf stundum að telja fólki trú um að maður sé að selja alvöru hamborgara. Maður er búinn að sjá matseðla á öðrum stöðum og borða á öðrum stöðum. Þeir auglýsa hiklaust 100% nautakjöt og þá skiptir engu máli hvað þeir eru með í raun og veru. En maður er farinn að sjá fólk koma tvisvar til þrisvar sinnum aftur hingað og þá veit maður að maður er á réttri leið," segir hann. „Svo kemur ferðamannastraumurinn um mánaðamótin. Þá er fullt af Íslendingum og mér skilst að það sé vel bókað út í fluginu í sumar."

freyr@frettabladid.is