Vill leika í Top Gun 2

Tom Cruise vonast til að leika í framhaldi kvikmyndarinnar vinsælu Top Gun frá árinu 1986. Í október var tilkynnt að vinnan við myndina væri hafin og orðrómur var uppi um að Cruise yrði í aukahlutverki. „Vonandi finnum við einhverja leið til að gera myndina. Ef við finnum rétta handritið sem við erum öll sátt við þá erum við öll tilbúin til að gera mynd sem yrði í svipuðum dúr og sú fyrri. Við erum að vinna í þessu,“ sagði Cruise við MTV.com. Cruise sést næst á hvíta tjaldinu í hasarmyndinni Misssion: Impossible – Ghost Protocol.