Þó líði sextíu ár

Stórsöngvarinn Björgvin Halldórsson heldur upp á sextugsafmæli sitt með tónleikum í Háskólabíói á afmælisdegi sínum 16. apríl. Þar verður farið yfir einstakan feril söngvarans allt frá því að hann var kjörinn poppstjarna ársins árið 1969 fram til dagsins í dag með viðkomu hjá HLH, Brimkló og Ðe lónlí blú bojs. Björgvin er einn ástsælasti og afkastamesti flytjandi þjóðarinnar en hann hefur hljóðritað um 900 lög, sjálfur og með öðrum.

En skyldi þá ekki vera erfitt að velja lög á tveggja og hálfs tíma tónleika?

„Jú, við erum einmitt að því núna. Við reynum bara að velja lög sem endurspegla hvert tímabil af ferlinum,“ segir Björgvin.

Björgvin Halldórsson var síðastliðinn nýársdag sæmdur riddarakrossi hinnar íslensku fálkaorðu af forseta Íslands. „Það var mjög skemmtileg tilfinning og ég lít svo á að ég hafi tekið við þessari viðurkenningu fyrir hönd íslenskra tónlistarmanna,“ segir Björgvin um atvikið. Björgvin segir að erfitt sé að velja minnisstæðustu atvikin af ferlinum, þau séu allt of mörg fyrir upptalningu: „En mér líður eins og þessi 40 ár hafi liðið á örskotsstundu þó að skemmtilegu hlutirnir sitji eftir,“ bætir hann við.

Björgvin hefur sett saman hljómsveit sérstaklega fyrir tónleikana en hana skipa margir af færustu hljóðfæraleikurum landsins. Þá kíkja góðir gestir í heimsókn en Eyjólfur Kristjánsson, Jóhanna Guðrún, Krummi, Mugison og Sigríður Thorlacius hafa þegar boðað komu sína og ekki er loku fyrir það skotið að fleiri bætist í hópinn þegar nær dregur.

„Hugsunin er að hafa þetta kósí kvöldstund með tónlist og spjalli, við ætlum að ná upp svona tjaldsamkomustemningu,“ segir Björgvin sem er alls ekki orðinn þreyttur á því að troða upp.

„Ég finn ekkert fyrir því að hafa náð þessum aldri. Ég hef aldrei verið í betra stuði en einmitt núna.“- drg