Boðið á fjórtán erlendar hátíðir

„Þetta er voðalega gott gengi miðað við litla íslenska stuttmynd,“ segir Jón Gústafsson.

Stuttmyndin In a Heartbeat, sem Jón framleiddi og konan hans, Karolina Lewicka, leikstýrði, hefur verið sýnd víða um heim að undanförnu við góðar undirtektir.

Myndinni hefur verið boðið á fjórtán hátíðir til þessa og meðal annars hefur hún verið sýnd á Ítalíu, í Kanada og Úrúgvæ þar sem hún var valin besta dramatíska stuttmyndin. Sömuleiðis fékk hún aukaverðlaun á Columbus-hátíðinni í Ohio.

In a Heartbeat verður sýnd á alþjóðlegri barnamyndahátíð í Chicago í næsta mánuði og einnig er búið að bjóða Jóni til Indlands í nóvember. „Hún er að fara á allar topp tíu barnamyndahátíðirnar,“ segir Jón, sem tekur þó fram að myndin hafi ekki verið gerð sérstaklega fyrir börn. Hún fjallar um níu ára stelpu sem öðlast kjark til að rísa upp á móti ódæðismönnum. Með hlutverk stelpunnar fer Elín Perla Stefánsdóttir. In a Heartbeat var frumsýnd á Alþjóðlegri kvikmyndahátíð í Reykjavík í fyrra og var í framhaldinu tilnefnd til Edduverðlaunanna.

Aðspurður segir Jón viðbrögðin við myndinni hafa verið miklu betri en hann þorði að vona. „Ég var sáttur við að hún færi bara á hátíðina í Reykjavík, ekki meira en það, en nú er hún búin að vinna þessi verðlaun.“

Síðasta mynd Jóns, Reiði guðanna, sem fjallar um gerð myndarinnar Bjólfskviðu, var einnig sýnd á fjölda kvikmyndahátíða og vann hún til margra verðlauna. - fb