Þybbinn Axl Rose í Ríó

Rokksveitin Guns N"Roses kom fram á tónlistarhátíðinni Rock In Rio í Brasilíu fyrir skömmu og þótti standa sig ágætlega, þrátt fyrir brösótta byrjun. Sérstaka athygli vakti þó formið á söngvaranum Axl Rose því hann greinilega hefur bætt á sig þó nokkrum aukakílóum að undanförnu. Rose var klæddur í gulan jakka, með hatt og sólgleraugu og þótti nánast óþekkjanlegur á sviðinu. Tónleikunum í Ríó var sjónvarpað beint á netinu. Hljómsveitin hefur verið á tónleikaferð um heiminn til að fylgja eftir plötu sinni Chinese Democracy.