Þóra Einarsdóttir syngur í Garðabæ

Þóra Einarsdóttir sópran er í aðalhlutverki á fyrstu tónleikum menningar- og safnanefndar Garðabæjar á þessu ári. Hún kemur fram ásamt Gerrit Schuil píanóleikara sem einnig er listrænn stjórnandi tónleikaraðarinnar sem hófst síðastliðið haust. Á efnisskránni eru verk eftir Gabriel Fauré, Jón Ásgeirsson, Tsjaíkovskí, Nikolaí Rimskí-Korsakov og Rakhmaninov.

Þóra Einarsdóttir er ein fremsta sópransöngkona Íslands. Hér heima er skemmst að minnast frammistöðu hennar í hlutverki Gildu í Rigoletto sem hún hlaut mikið lof gagnrýnenda fyrir. Fyrir utan óperusöng hefur Þóra alla tíð lagt mikla rækt við ljóðasöng. Á undangengnum tuttugu árum hefur hún ávallt leitast við að takast á við ný viðfangsefni og spannar nú verkefnalisti hennar á sviði ljóðasöngs ógrynni ljóða á fjölda tungumála. Gerrit Schuil hefur haldið fjölda tónleika hér á landi síðan hann settist hér að í upphafi tíunda áratugarins.

Tónleikarnir eru haldnir á morgun og hefjast klukkan 16. Þeir fara fram í safnaðarheimili Vídalínskirkju í Garðabæ.