Ashley nær í Cheryl aftur

Hið ótrúlega hefur gerst; Ashley og Cheryl Cole eru byrjuð aftur saman. Breskir fjölmiðlar vita varla í hvorn fótinn þeir eiga að stíga því endurnýjaðar örvar Amors koma eins og þruma úr heiðskíru lofti.

Knattspyrnukappinn Ashley Cole og söngfuglinn Cheryl Cole eru byrjuð aftur saman. Breska pressan fékk það staðfest um helgina og ætlar Ashley að biðja Cheryl um að giftast sér. Parið lét vel að hvort öðru í afmælisveislu Cheryl um helgina og þau skiptust á kossum fyrir framan vini og vandamenn, þar á meðal móður Cheryl, sem er víst ekki par hrifin af ráðahagnum. Hún er sannfærð um að Ashley sé einskis verður kvennabósi.

Samkvæmt Daily Mail kviknaði ástareldurinn milli Ashley og Cheryl nokkru áður en söngkonan hóf störf í hinum bandaríska X-Factor. Sambandið náði síðan nýjum hæðum þegar Cheryl flutti út til Bandaríkjanna. „Hún var ekki með sjálfri sér í upptökunum, allir sáu það, líka Simon Cowell,“ segir heimildarmaður Daily Mail. Bresku blöðin hafa gert því skóna að aðalástæðan fyrir því að Cheryl og Ashley hafi ákveðið að gefa sambandinu annað tækifæri sé sú að þau þrái bæði að eignast börn.

Ashley og Cheryl hættu saman fyrir níu mánuðum. Ashley hafði þá verið að gamna sér með öðrum stúlkum og sent þeim myndir af sjálfum sér fáklæddum sem rötuðu síðan á forsíður blaðanna. Leikmaður enska landsliðsins og bakvörður Chelsea átti í kjölfarið ákaflega erfitt bæði innan og utan vallar en aðdáendur annarra liða bauluðu óspart á hann. Ferill Cheryl blómstraði hins vegar og hún virtist vera að ná toppnum þegar henni var boðið dómarastarf í ameríska X-Factornum. Það reyndist hins vegar skammvinnur vermir og þá kom Ashley henni til bjargar, fæddi hana og klæddi þegar heimurinn virtist hafa snúið við henni baki.

freyrgigja@frettabladid.is