Sér sjálfan sig í Viggó viðutan

Freyr Eyjólfsson, útvarpsmaðurinn góðkunni á Rás 2, segist eiga ýmislegt sameiginlegt með hinum skrautlega Viggó viðutan og leitar nú logandi ljósi að bókum um myndasöguhetjuna sem Freyr segir vera hálfgerðan tvífara sinn.

Útvarpsmaðurinn Freyr Eyjólfsson auglýsti í gær á flóamarkaði Andra Freys og Gunnu Dísar á Rás 2 eftir Viggó-bókum og býðst til að kaupa þær. Freyr fer ekki í neinar grafgötur með það að Viggó sé andlegur leiðtogi hans.

„Viggó lætur sér aldrei leiðast, hefur gaman af lífinu, spilar á asnalegt hljóðfæri, gerir ekkert í vinnunni, truflar aðra og pirrar yfirmenn sína óendanlega án þess þó að vera rekinn. Alveg eins og ég," segir Freyr. „Ekki skemmir heldur fyrir að sætasta stelpan í bókunum, hinn nafnlausi ritari, er nauðalík konunni minni."

Freyr las Viggó-bækurnar þegar hann var yngri en þegar aldurinn færðist yfir missti útvarpsmaðurinn sjónar af snilldinni. „Ég gaf frænda mínum allar Viggó-bækurnar mínar þegar ég var tólf ára en hef svo verið að reyna að eignast þær aftur."

Hann lýsir því yfir að þetta séu einfaldlega sígildar bókmenntir. „Þrjár myndasögur virðast hafa staðist tímans tönn, það er Tinni, Ástríks-bækurnar og svo Viggó," útskýrir Freyr og bætir því við að síðasttalda persónan sé í eftirlæti hjá sér sökum þess að þær bækur skarti skemmtilegum aukapersónum, séu vel teiknaðar og einfaldlega ótrúlega fyndnar.

Freyr hefur ekki haft erindi sem erfiði við að hafa upp á Viggó-bók en í þeim töluðu orðum röltir fréttamaðurinn Ingólfur Bjarni Sigfússon fram hjá og skýtur því að Frey að hann eigi flestar ef ekki allar Viggó-bækurnar, þær séu kyrfilega geymdar ofan í kassa.

„Og viltu ekki selja mér þær?," spyr Freyr, vongóður um að Ingólfur kenni í brjósti um sig og Viggó-leysi sitt. En svar Ingólfs reynist vera neikvætt. „Ég vil bara hvetja bókaútgefendur til að gefa þessar bækur aftur út. Og þeir sem eiga þessar bækur og vilja losa sig við þær mega endilega hafa samband við mig," segir Freyr.

freyrgigja@frettabladid.is