Gunnar stóð við stóru orðin

„Þetta er eitthvað sem þjóðin verður að vita. Ég stóð við stóru orðin," segir Gunnar Hansson leikari.

Eins og Fréttablaðið greindi frá blésu listamenn til golfmóts á Bakkakotsvelli í Mosfellsdal 2. júní. Gunnar Hansson lýsti því þar yfir að hann hygðist vinna mótið, hann hefði verið svo skelfilega lélegur á þessu sama móti í fyrra. Og viti menn, Gunnar stóð uppi sem sigurvegari. Hann hafnaði í 1.-2. sæti með forgjöf en vann mótið án forgjafar, lék hringinn á 73 höggum og fékk meðal annars sex fugla.

Arnar Jónsson leikari, annar liðtækur kylfingur, hafnaði í 10. sæti, lék hringinn á 85 höggum en í þriðja sæti varð blúskóngurinn Halldór Bragason. Hann lék Bakkakotsvöll á 79 höggum. Gunnar Björn Guðmundsson, Skaupsleikstjórinn góðkunni, átti sæmilegan dag í Mosfellsdalnum og hafnaði í átjánda sæti en hann lék hringinn á 92 höggum.

Spaugstofufélagarnir fyrrverandi, Sigurður Sigurjónsson og Randver Þorláksson, áttu hins vegar ekki góðan dag á golfmótinu því Randver lék á 102 höggum og Sigurður kom inn á 109 höggum. Kjartan Guðjónsson leikari varð síðan þriðji neðsti en hann lék hringinn á 118 höggum. Kjartani til málsbóta má nefna að hann var skráður með 36 í forgjöf.- fgg