Endless Dark spilar á Graspop

„Þetta verður mjög spennandi," segir Atli Sigursveinsson, gítarleikari Endless Dark.

Rokksveitin hefur verið bókuð á tónlistarhátíðina Graspop sem verður haldin í Belgíu í júní. Þetta er árleg hátíð þar sem margar af þekktustu rokksveitum heims stíga á svið. Í þetta sinn spila þar risar á borð við Slipknot, Korn, Ozzy Osbourne, Scorpions og Whitesnake, ásamt auðvitað íslensku rokkurunum.

Endless Dark spilaði á tónlistarhátíðinni Eurosonic í Hollandi í síðasta mánuði. Útsendari frá Graspop var á þeirri hátíð og átti frammistaða sveitarinnar þátt í að tryggja henni sæti á belgísku rokkhátíðinni.

Endless Dark spilar á útgáfutónleikum á Sódómu Reykjavík á laugardaginn til að kynna EP-plötu sína Made Of Glass. „Við erum búnir að vera mjög lengi að gera hana. Það eru búnar að vera tafir en það verður miklu léttara að gefa út plötu eftir þetta," segir Atli en hljómsveitin gefur plötuna út sjálf.

Um tvenna tónleika verður að ræða á laugardaginn og eru þeir hluti af Tvípunkti, nýrri tónleikaröð Rásar 2. Um miðjan daginn verða fjölskyldutónleikar þar sem sveitin spilar ásamt Helga Val og um kvöldið verður Helgi aftur á sviðinu ásamt Endless Dark og rapparanum Blazroca.

- fb