Íslensk tónlist og hasarmynd

Íslenskri tónlist bregður fyrir í tveimur kvikmyndum sem frumsýndar verða um helgina. Annars vegar semur Atli Örvarsson alla tónlistina við The Eagle og hins vegar eiga piltarnir í Sigur Rós lokalagið í 127 Hours eftir Danny Boyle. Lagið er Festival af plötunni Með suð í eyrum við spilum endalaust.

The Eagle fjallar um baráttu rómverska hershöfðingjans Marcus Aquila við vígalega villimenn á Englandi en hann er þar staddur til að rannsaka dularfullt hvarf 9. herdeildar Rómarkeisara. Leikstjóri myndarinnar er Kevin Macdonald en með helstu hlutverk fara þeir Channing Tatum, Jamie Bell og Donald Sutherland.

127 Hours er tilnefnd til fjölda Óskarsverðlauna en myndin segir frá fjallgöngumanni sem festist og þarf að saga af sér framhandlegginn til að halda lífi. Aðalleikari myndarinnar, James Franco, hefur fengið stórkostlega dóma fyrir leik sinn en áhorfendur er beðnir um að hlusta sérstaklega eftir lagi Sigur Rósar, Festival, í einum af hápunktum myndarinnar.

I'm Number Four er síðan þvottekta hasarmynd frá meistara þeirra mynda, Michael Bay. Hún segir frá John Smith, sem þykist vera venjulegur menntaskólanemi en hefur í raun og veru yfirnáttúrulega krafta. Og að sjálfsögðu vilja illmenni koma honum fyrir kattanef.

Loks verður að nefna þriðju myndina í seríunni Big Momma's House sem Martin Lawrence hefur talið hæft að bjóða fólki upp á undanfarin ár.