Geimverur ráðast á jörðina

Battle: Los Angeles verður frumsýnd hérlendis á morgun og á hún vafalítið eftir að njóta sín vel á hvíta tjaldinu enda uppfull af sprengingum og tæknibrellum eins og algengt er með myndir í þessum dúr.

Söguþráðurinn er á þann veg að í fjöldamörg ár hafa staðfest atvik varðandi fljúgandi furðuhluti átt sér stað víða um heim; í Buenos Aires, Seoul, Frakklandi, Þýskalandi og Kína. En árið 2011 breytast þessi einstöku sakleysislegu atvik í skelfilegan veruleika þegar jörðin sætir árás frá óþekktum öflum. Á meðan fólk um allan heim fylgist með helstu borgum jarðar falla hverri á fætur annarri, er einn staður eftir þar sem lokabardagi mannkynsins fer fram, í orrustu sem enginn bjóst við. Það veltur á Nantz (Aaron Eckhart) og sveitinni hans að draga línuna og berjast við óvin sem á sér engin fordæmi. Auk Eckharts eru í helstu hlutverkum þau Michelle Rodriguez, Michael Peña, Nzinga Blake og Ne-Yo.

Leikstjóri er Jonathan Liebesman sem á að baki hryllingsmyndirnar The Texas Chainsaw Massacre: The Beginning og Darkness Falls. Hann ætti því að eiga auðvelt með að halda bíógestum á sætisbrúninni í Battle: Los Angeles.

Myndatakan er í heimildarmyndarstíl og með því vildi Liebesman líkja eftir myndum á borð við Black Hawk Down og United 93 þar sem heppnaðist vel að auka raunsæisgildið með hreyfanlegri myndatökunni.

Battle: Los Angeles fylgir í fótspor geimverumynda undanfarinna ára þar sem mannkynið er í bráðri hættu og menn þurfa að hafa sig alla við til að verða ekki undir. Dæmi um þetta eru Independence Day og War of the Worlds sem báðar gengu gríðarlega vel, enda virðast geimverur og árásir þeirra á mannkyn alltaf jafn áhugaverðar fyrir bíógesti.

Þess má geta að tónlistarmaðurinn Jóhann Jóhannsson samdi tónlistina við stiklurnar úr myndinni. Miðað við hversu áhrifaríkar þær eru og passa vel við viðfangsefnið eiga verkefni Jóhanns í Hollywood vafalítið eftir að verða mörg á næstu árum.