Quarashi aftur í ræturnar

Rappararnir í Quarashi ætla að sækja aftur í ræturnar á endurkomutónleikum sínum í sumar. Gísli Galdur og Opee stíga báðir á svið með hljómsveitinni.

Í tilefni af endurkomu Quarashi á Bestu útihátíðinni í júlí hefur hljómsveitin ákveðið að sækja aftur í ræturnar hvað útsetningar á tónlistinni varðar.

 

Þegar sveitin hóf störf um 1996 snerist allt um trommur, sömpl og tilburði plötusnúðarins. Gísli Galdur, sem var plötusnúður hjá Quarashi síðustu ár hennar, mun aðstoða við að færa eldri lög sveitarinnar í hipphopplegri búning og einhverjum lögum verður skotið saman. „Við ætlum að leika okkur með „playbackið" og reyna að keyra það dálítið skemmtilega þannig að þetta verði dálítið þéttur pakki," segir Gísli Galdur. „Þetta er rosamikið af hitturum og ég held að það verði mjög skemmtilegt að grufla aðeins í þessu. Þarna verður líka góð blanda af þessu gamla og nýja."

Hvorki bassa- né gítarleikari verður því með Quarashi á tónleikunum og því er ekkert pláss fyrir náunga á borð við leikstjórann Gauk Úlfarsson og Smára „Tarf" Jósepsson sem spiluðu með sveitinni á sínum tíma.

 

Rapparinn Ólafur Páll Torfason, betur þekktur sem Opee, var gestur í Quarashi um stund og söng með sveitinni lagið Mess It Up. Hann tekur einnig þátt í endurkomu Quarashi og flýgur hingað frá Danmörku. Þar er hann að útskrifast úr viðskiptanámi hjá Handelshøjskolen i København. „Ég held að þetta verði mjög skemmtilegt. Það er svo langt síðan síðast og það er gaman að allir séu með," segir Ólafur Páll. „Það er langt síðan ég hef tekið þetta lag en ég reikna með því að það hafist."

 

Eftir að Ólafur Páll hætti í Quarashi starfaði hann með hljómsveitinni O.N.E. Síðan hann flutti til Danmerkur árið 2009 hefur hann eitthvað gert af því að semja og spila sem plötusnúður en langmestur tími hefur þó farið í námið. Engu að síður segist hann vera í hörkuformi. „Ég stefni að því að mæta á æfingar í byrjun júlí og heilsa upp á mannskapinn. Það verður gaman að rifja upp gamlar stundir."freyr@frettabladid.is