Röddin er hljóðfærið mitt

Rokkararnir í Steelheart spila á Nasa á miðvikudag. Söngvarinn Mili passar vel upp á háa rödd sína, sem er alveg jafn kraftmikil og fyrir tuttugu árum.

 

Bandaríska rokkhljómsveitin Steelheart sló í gegn í byrjun tíunda áratugarins með kraftballöðunni She"s Gone þar sem rödd króatíska söngvarans Miljenko Matijevic, eða Mili, nær hæstu hæðum. Smáskífulagið I’ll Never Let You Go náði einnig miklum vinsældum og var annað mest umbeðna lagið á MTV. Síðan þá hefur sveitin hætt tvívegis en alltaf rifið sig upp á nýjan leik.

 

Steelheart spilar á Nasa á miðvikudagskvöldið. Mili er spenntur fyrir komunni til Íslands og ætlar að gefa sér tíma til að kynnast landinu áður en tónleikarnir hefjast. „Ég hlakka til skoða mig um og fá mér gott lambakjöt í leiðinni,“ segir hann, greinilega búinn að frétta af hinu bragðgóða íslenska kjöti.

Steelhart er í hörkuformi að hans sögn og tilbúin í tónleikahald úti um allan heim í sumar, þar á meðal í Svíþjóð, Indónesíu, Púertó Ríkó og Suður-Kóreu.

 

„Við höfum verið að vinna eins og brjálæðingar við að endurbyggja Steelheart. Tónlistin hefur breyst og þroskast, alveg eins og við sjálfir. Við tókum upp Black Dog [með Led Zeppelin] og ætlum að reyna að gefa út nýtt smáskífulag á þriggja mánaða fresti,“ greinir Milo frá.

 

Aðspurður segir hann að Steelheart sé ekki lengur sú hár-metal hljómsveit sem hún var til að byrja með. „En þetta tímabil var frábært og við skemmtum okkur ótrúlega vel. En það er kominn tími til að breytast. Tónlistin okkar hefur þróast og í framtíðinni viljum við prófa öðruvísi hluti.“

 

Árið 1992 gaf Steelheart út plötuna Tangled in Reins. Á tónleikaferðalagi til að fylgja henni eftir lenti Mili í alvarlegu slysi þegar ljósamastur upp á hálft tonn féll á hann á miðjum tónleikum eftir að hann reyndi að klifra upp á það. Við tók löng sjúkrahúslega og hljómsveitin lagði upp laupana. „Þetta var mjög erfiður tími eftir slysið. Það var ekki fyrr en tveimur vikum eftir að ég kom heim sem ég byrjaði að finna fyrir miklum höfuðverkjum. Ég var mörg ár að jafna mig,“ segir Mili.

 

Fjórum árum eftir slysið endurvakti Mili Steelhart en þá hafði tónlistarslandslagið breyst og hljómsveitin lagðist aftur í dvala. Það var svo 2001 að Mili fékk uppreisn æru þegar hann var fenginn til að syngja fyrir leikarann Mark Wahlberg í kvikmyndinni Rock Star. Tónlistin í myndinni hitti í mark, þar á meðal lag Steelheart, We All Die Young.

 

Mili er þekktur fyrir kraftmikla rödd sína sem kemst óvenju hátt. Aðspurður segir hann röddina enn þá vera í toppstandi en viðurkennir að hann þurfi að leggja mikið á sig til að halda henni góðri. „Ég stunda líkamsrækt, drekk ekki áfengi og nota engin eiturlyf. Maður verður sífellt að vera vakandi, enda er röddin hljóðfærið mitt.“

 

Hann nýtur mikillar virðingar í bransanum og söng til að mynda með Ray Manzarek og Robby Krieger úr hljómsveitinni The Doors á síðasta ári. Gerð heimildarmyndar um ævi hans hefur einnig staðið yfir undanfarið tvö og hálft ár og fer hann til heimaborgar sinnar Zagreb í sumar þar sem tónlistarhátíð verður haldin í tilefni myndarinnar.

 

Enn eru til miðar á tónleikana á Nasa á miðvikudaginn og fást þeir á Midi.is. Miðaverð er 3.500 krónur og munu hljómsveitirnar Dúndurfréttir, Exizt og Atrum hita upp.

freyr@frettabladid.is