Bifreiðastöður nálægt þróttavöllum vandamál

Bifreiðastöður ökutækja nærri íþróttavöllum hafa í gegnum tíðina verið vandamál. Ökumenn leggja þá gjarnan sem næst leikvöngum og þá upp á graseyjum, gangstéttum og göngustígum. Í stöku tilvikum er einnig lagt á og við gangbrautir.

Lögreglan segir að brot sem þessi bjóði heim hættu fyrir gangandi vegfarendur, skapi vandræði fyrir almenningssamgöngur og valdi skemmdum hjá sveitarfélögum. Jafnframt geti svona stöðubrot gert mjög erfitt fyrir þegar um neyðarakstur lögreglu, slökkviliðs og sjúkraliðs er að ræða.

Lögreglan hefur vakið athygli á vandamálinu oftar en einu sinni og auglýst aukið eftirlit vegna þessa við íþróttavelli á höfuðborgarsvæðinu. Árangur hefur orðið nokkur en ástandið er þó enn óviðunandi. Lögreglan biðlar nú til ökumanna sem sækja íþróttakappleiki að sýna gott fordæmi og leggja ökutækjum sínum löglega. Brotlegir munu þurfa að greiða stöðubrotsgjald.