Móðir Sjonna: Sjonni var með okkur

„Við erum að springa úr gleði, það er ekkert annað hægt," sagði Bjarney Sigríður Sigurjónsdóttir, móðir Sjonna Brink, í gærkvöldi eftir að ljóst var að lagið Aftur heim eða Coming home var komið áfram úr undanriðli Eurovision.

Bjarney segist alltaf hafa haft trú á að lagið myndi komast áfram. "Við gefumst aldrei upp og vissum að ef lagið yrði ekki lesið upp númer tvö yrði það níunda eða tíunda í röðinni. Það gekk upp."

Bjarney segir að þótt gleðin sé mikil hafi þetta verið rússibanareið fyrir fjölskylduna. „Sjonni er búinn að vera hjá okkur hér í kvöld og þess vegna gekk þetta svona vel. Það er ekki spurning," segir Bjarney.