Sjóðheitt sýnishorn úr Okkar eigin Osló

Vísir frumsýnir hér sjóðheitt sýnishorn úr rómantísku gamanmyndinni Okkar eigin Osló sem verður frumsýnd 4. mars.

Þetta er annað sýnishornið sem birtist úr myndinni og er það langt og skemmtilegt. Það er greinilegt að það mæðir mikið á aðalleikurunum Þorsteini Guðmundssyni og Brynhildi Guðjóns. Þá fer ekki milli mála að aðrir leikarar fara á kostum í myndinni, Hilmir Snær, María Heba, Laddi, Ari Eldjárn, Steindi jr. og fleiri.

Reynir Lyngdal leikstýrir myndinni sem gerist í Osló, sumarhúsahverfi við Þingvallavatn og í Reykjavík. Fylgst er með tveimur gerólíkum manneskjum gera tilraun til þess að stofna til náinna kynna; Haraldi verkfræðingi hjá Marel og Vilborgu, bankastarfsmanni og einstæðri móður.

Nýlega var titillag myndarinnar frumflutt en það er í flutningi Memfismafíunnar og Valdimars Guðmundssonar. Það er eftir Helga Svavar úr Hjálmum og Braga Valdimar Baggalút. Hægt er að hlusta á lagið hér á vef Dr. Gunna.

Kíkið einnig á Facebook-síðu myndarinnar.