Spilar á frelsishátíð í Kosovo

Rokksveitin Who Knew verður á faraldsfæti á næstu mánuðum og spilar meðal annars á tónlistarhátíðinni Freedom Festival í Pristina, höfuðborg Kosovo, í júní.

„Þetta er risafestival. Ég held að þetta verði alveg geðveikt,“ segir söngvarinn Ármann Ingvi Ármannsson. Hljómsveitin GusGus spilaði á sömu hátíð í fyrra ásamt bandaríska rapparanum Method Man.

Næstu tónleikar Who Knew verða á Eurosonic-bransahátíðinni í Hollandi 13. janúar. Þar stíga einnig á svið Dikta, Ólöf Arnalds, Endless Dark og Lára, eins og Fréttablaðið hefur greint frá. Til að safna peningum fyrir ferðalaginu og frekara tónleikahaldi erlendis heldur Who Knew styrktartónleika á Sódómu á laugardagskvöld ásamt Nolo og Sing for Me Sandra. „Við komumst ekki í Loftbrúna þannig að stærsti hængurinn fyrir okkur er að safna styrkjum til að komast út svo við getum spilað á mismunandi stöðum,“ segir Ármann. „Við þurfum að kynna okkur á nýjum mörkuðum.“

Fyrsta plata Who Knew, Bits and Pieces of a Major Spectacle, kom út síðasta vor bæði hér heima og í Þýskalandi, þar sem sveitin er með umboðsmenn. Þeir virðast vera að standa sig í stykkinu því tónleikar eru einnig fyrirhugaðir í Hamborg, Berlín, London og á tónlistarhátíðunum By:Larm í Noregi og South by Southwest í Texas. Erlendar útgáfur hafa sömuleiðis sýnt áhuga á Who Knew og líklega mun sveitin skrifa undir samning við fyrirtæki sem er með bækistöðvar í Japan og Taívan. Bandarískir risar hafa einnig gjóað augunum til sveitarinnar, þar á meðal Universal og Atlantic Records, ásamt útgáfunni Red Ryder.- fb