Spilar með Hjálmum í Hollandi

Valdimar Guðmundsson, söngvari hljómsveitarinnar Valdimar, spilar með Hjálmum á bransahátíðinni Eurosonic sem verður haldin í Hollandi 11. til 13. janúar.

„Ég ætla að spila með þeim á básúnu og syngja með þeim bakraddir því Sammi [Samúel J. Samúelsson] kemst ekki í þetta skipti,“ segir Valdimar.

Þetta verður í fyrsta sinn sem hann spilar með Hjálmum og leggst það vel í hann. „Það verður gaman að spila á Eurosonic. Það hefði verið skemmtilegt að troða Valdimar þarna inn líka en kannski á næsta ári. Þá tek ég kannski diska með og dreifi þeim út um allt.“

Valdimar ætlar að fara til Hollands á undan Hjálmamönnum til að hitta gítarleikarann Ásgeir sem er þar í tónlistarnámi. „Við munum örugglega semja lög saman. Þetta byrjaði allt þannig, ég og hann að semja lög,“ segir hann og vonast til að hljómsveitin taki upp nýja plötu í maí á næsta ári.

Valdimar var nýlega tilnefndur sem söngvari ársins á Íslensku tónlistarverðlaununum, auk þess sem lagið Yfirgefinn fékk tilnefningu, enda var það mjög vinsælt á árinu. „Það er gaman að fá þessar tilnefningar.

Í fyrra fengum við tilnefningu sem bjartasta vonin og maður hafði kannski vonast til að fá fleiri tilnefningar en platan var ekki búin að vekja athygli þá. En það er rosa hrós að vera tilnefndur núna og gaman að vera í frábærum hópi söngvara.“

Hljómsveitin Valdimar spilar á Þorláksmessutónleikum í kvöld á Nasa ásamt Moses Hightower og Ojba Rasta!. Það verður rosalega gaman,“ segir söngvarinn og lofar skemmtilegum tónleikum. - fb