Alli abstrakt nennti í viðtal

„Þetta er svona einn dagur á viku sem maður lætur eins og algjör letingi. Þetta lag var gert á svoleiðis degi," segir rapparinn Alexander Jarl Abu-Samrah, betur þekktur sem Alli abstrakt.

Alli sendi nýlega frá sér myndband við lagið Nenni ekki, sem hefur vakið talsverða athygli á myndbandasíðunni Youtube. Í laginu túlkar Alli mikinn letingja, en hann segir mánudagana oftast verða fyrir barðinu á letinni. „Því miður," segir hann.

Alli var að læra undir jarðfræðipróf þegar Fréttablaðið hafði samband en tók sér smá hlé til að ræða við blaðamenn, gegn því að viðtalið yrði ekki of langt. Í laginu Nenni ekki virðist hann vera undir miklum áhrifum frá íslenskum röppurum á borð við Sjöberg og Skytturnar. Hann staðfestir það. „Ég er undir miklum áhrifum frá þeim. Ég elska Sjöberg og Skytturnar, þeir eru hestu áhrifavaldarnir mínir ásamt Forgotten Lores," segir hann.

Plata er á leiðinni frá Alla á næstunni, en hann ætlar að gefa hana á netinu. „Ég ákvað að gefa hana frítt út, ég nennti ekki að standa í neinu veseni," segir hann, „Hún er tilbúin en ég er að redda umslaginu og svoleiðis."- afb