Bale vísað á brott í Kína

Christian Bale var meinað að hitta Chen Guangcheng sem er í stofufangelsi í Kína eftir að hafa barist fyrir auknum mannréttindum þar í landi. Leikarinn er staddur í Kína til að kynna myndina The Flowers of War sem gerist þar á fjórða áratugnum. Þegar hann ætlaði að heimsækja Guangcheng með tökulið frá CNN með í för var honum vísað á brott. „Ég er ekkert hugrakkur. Ég vil bara styðja við bakið á fólki sem býr hérna og stendur upp í hárinu á yfirvöldum og hefur verið lamið og fangelsað,“ sagði Bale. „Mig langaði bara að heilsa þessum manni og segja honum hversu mikinn innblástur hann hefur veitt mér.“