Frumsýna nýja heimildarmynd um Nóbelsskáldið

Ný heimildarmynd um Halldór Kiljan Laxness verður frumsýnd í Bíói Paradís í kvöld. Fjöldi erlendra viðmælenda fjallar um Halldór í samhengi sem ekki hefur áður birst í myndum um skáldið.

„Við erum ánægðir með útkomuna," segir Halldór Þorgeirsson kvikmyndargerðarmaður. Ný heimildarmynd hans, Hauks Ingvarssonar og Sigurðar Valgeirssonar, um Nóbelsskáldið Halldór Kiljan Laxness, HKL, verður frumsýnd í dag.

„Verkefnið varð nú eiginlega til þannig að stundum vorum við spurðir hvort ekki væri til heimildarmynd um Halldór Laxness. Þær eru nú vissulega til einhverjar, en þær eru voðalega mikið sniðnar að þörfum Íslendinga. Þessi mynd er tekin upp í Ameríku og Evrópu og við tölum við fólk sem veit býsna mikið um Laxness en er ekki Íslendingar. Stundum gleymum við að flestir lesendur Halldórs tala ekki íslensku. Við getum rétt ímyndað okkur hversu stór lesendahópurinn er úti þegar bækur hans hafa selst í hundruðum þúsunda og jafnvel milljónum eintaka."

Í myndinni er sjónum beint að pólitískum skoðunum Halldórs Laxness, hvernig þær mótuðu hann sem rithöfund og sviptu hann stórum tækifærum síðar meir. Halldór segir að í myndinni fjalli þeir um skáldið í samhengi við þá heimsatburði sem höfðu áhrif á hann. „Halldór fer út sem ungur maður, varla orðinn sautján ára, og dvelur mikið erlendis. Hann er á Ítalíu þegar fasistarnir taka völdin, og á Spáni. Hann er í Þýskalandi og fer til Sovétríkjanna. Hann er í Ameríku þegar stóra kreppan skellur á. Hann stígur eiginlega úr þessum annars rólega heimi hér, yfir í þennan heim eins og hann var eftir fyrri heimsstyrjöld þar sem var bara ringulreið."

Aðstandendur myndarinnar eiga nú í viðræðum um dreifingu erlendis, en líklegt er að mikil eftirspurn sé eftir ítarlegri mynd um forvitnilega ævi skáldsins. HKL verður sýnd í kvöld, klukkan 20 í Bíói Paradís við Hverfisgötu.

bergthora@frettabladid.is