Gengið og prjónað

Hélène Magnússon, hönnuður og eigandi prjónaritsins prjonakerling.is, er nýkomin úr prjónaferð yfir Fimmvörðuháls. Hún fór fyrir tólf manna fjölþjóðlegum hópi og afrekaði það að prjóna heila peysu á leiðinni.

„Í gamla daga þegar fólk mátti engan tíma missa var ekki óalgengt að konur jafnt sem karlar prjónuðu á meðan gengið var á milli bæja eða hugað að skepnum úti á engjum. Oftast var fólk með eitthvað lítið og létt eins og sokka og vettlinga á prjónunum sem var eflaust betra því eftir því sem peysan stækkaði fór hún að síga svolítið í,“ segir Hélène sem gekk með hnykilinn í handarkrikanum alla leiðina en það var einnig venjan á árum áður.

Hún segir prjónaskapinn engu að síður hafa gengið vel og hjálpað henni að halda jöfnu tempói í ferðinni. „Sem leiðsögumaður þarf maður að fara hægar yfir en á eigin vegum og þetta hægði aðeins á mér. Þá var stoppað með reglulegu millibili og prjónað. Við tylltum okkur meðal annars á nýja fjallið Magna en stöldruðum ekki lengi við enda hefur það ekki ennþá náð að kólna og okkur varð fljótt heitt á rassinum.“

Fyrirhugað er að uppskriftin að peysunni, sem hefur fengið nafnið Fimmvörðuháls, birtist í bandarísku peysubókinni Sweaters From Around the World á næsta ári. Um er að ræða aðsniðna peysu sem minnir á gömlu íslensku peysufötin en Hélène er þekkt fyrir óþrjótandi áhuga á íslenskri prjónahefð. Hann ásamt áralangri reynslu hennar sem fjallaleiðsögumaður á Íslandi er hvatinn að prjónaferðunum sem hún fer í samstarfi við Íslenska fjallaleiðsögumenn.

„Ferðirnar ganga út á að kynnast landinu og ferðast um það með prjón að leiðarljósi,“ segir Hélène. „Þær bjóða upp á blöndu af stórfenglegri náttúru, íslenskri menningu, prjónasögu og prjónanámskeiðum.“

Þátttakendur koma frá Evrópu, Norður-Ameríku og Skandinavíu en ferðirnar eru einnig opnar Íslendingum. Fram undan er haustprjónaferð í nágrenni Selfoss í nóvember og vetrarprjónaferð i Landmannalaugar í mars en þá verður prjóni og gönguskíðaiðkun fléttað saman. Nánari upplýsingar er að finna á www.prjonakerling.is

vera@frettabladid.is