George Michael með lungnabólgu

George Michael hefur neyðst til að aflýsa fleiri tónleikum vegna veikinda. Michael er á tónleikaferðalagi sem nefnist Symphonica en hann er að berjast við lungnabólgu. Tónleikaferðalag Michaels hófst í ágúst á þessu ári og síðustu tónleikar hans voru í október í Royal Albert Hall þann 11. október. Hann neyddist hins vegar til að hætta við tónleika sem hann ætlaði að halda þann 26. október og varð loks að aflýsa öllu tónleikahaldi í Vín, Strassburg og Cardiff.

Í yfirlýsingu sem Michael sendi frá sér kom fram að vegna fyrirmæla frá læknum yrði hann að draga sig í hlé frá tónleikahaldi til að ná sér góðum af veikindum sínum. Söngvarinn hefur sjálfur beðist afsökunar á þessu og hefur lýst því yfir að hann ætli sér að bæta upp fyrir þetta. Hann hefur þegar tilkynnt að hann muni halda tónleika í London í maí á næsta ári og er að leita að hentugum dagsetningum til að koma fram í Austurríki, Frakklandi og Wales.