Golfbókin eyðilagði golfsumarið mitt

„Þetta var mjög stíf vinna í júlí, ágúst, september og október, þá var maður eiginlega að frá klukkan átta á morgnana til fjögur um nóttina,“ segir Frosti B. Eiðsson en hann hefur lagt nótt við nýtan dag að klára bókina Golf á Íslandi sem hæglega mætti kalla „biblíu“ íslenskra kylfinga. Bókin, sem er 240 síður, inniheldur upplýsingar og sögu allra golfvalla á Íslandi auk annars skemmtilegs fróðleiks. Meðal þeirra sem láta ljós sitt skína í bókinni eru Ragnhildur Sigurðardóttir og Birgir Leifur Hafþórsson, margfaldir Íslandsmeistarar í golfi.

Frosti, sem er sjálfur mikill kylfingur og hefur verið með lægst sex í forgjöf en er núna með níu, segir bókina eiginlega hafa eyðilagt golfsumarið fyrir sér, hann gráti það þó þurrum tárum. „Þetta var mjög stíf vinna en það jafnast ekkert á við það að vera með myndavélina á lofti, úti á velli, að fylgjast með fólki líða vel og þurfa sjálfur ekkert að hafa áhyggjur af vondu höggunum,“ segir Frosti.

Hann bætir því við að það hafi komið honum á óvart hversu margir voru reiðubúnir til að leggja þessu verkefni lið en sjálfur tekur hann rúmlega helming allra mynda sem birtast í bókinni. Golfið hefur notið geysilegra vinsælda hér á landi og hefur breyst úr því að vera svokallað „elítusport“ í að verða íþrótt fyrir alla. Það kemur því ekkert á óvart að fjöldi nafntogaðra einstaklinga skuli leggja til sögur af golfvellinum í bókinni, svo sem Eyjólfur Kristjánsson og Sigmar Vilhjálmsson, kenndur við Hamborgarafabrikkuna. - fgg