Opnar nýjan stað á afmælisdaginn

„Þetta verður stærsti staðurinn, í fermetrum talið,“ segir Friðrik Weisshappel, athafnamaður í Kaupmannahöfn. Hann opnar þriðja Laundromat-staðinn sinn í höfuðborg Danmerkur þann 6. desember en þá á hann einmitt afmæli, verður 44 ára.

Staðurinn stendur á sólríku horni á Gammel Kongevej 96 en þar var áður að finna teppabúð. Friðrik fékk húsnæðið afhent á laugardaginn og hefur síðan þá unnið daga og nætur við að rífa niður og byggja aftur upp. „Vinnudagarnir hafa verið sirka 17 tímar síðustu þrjá eða fjóra daga,“ segir Friðrik en hann auglýsti meðal annars eftir nýju starfsfólki á nýja staðinn í Fréttablaðinu. „Af hverju ekki? Ef einhvern langar til að koma út og gera eitthvað skemmtilegt. Ég þarf að ráða 25 manns,“ segir Friðrik og bætir því við að honum finnist líka bara gaman að gera auglýsingar.

Laundromat-staðirnir eru því orðnir fjórir en Friðrik segir að staðurinn við Austurstræti í miðborg Reykjavíkur gangi mjög vel, þeir séu meðal annars búnir að kaupa eldhúsið á La Primavera til að anna eftirspurn. „Þetta gengur vel, það er ekkert launungarmál og lykilatriðið að þessu er gott starfsfólk og góður endurskoðandi, ég fæ ekki að kaupa neitt nema hún sé búin að gefa mér leyfi.“ Friðrik vildi hins vegar ekkert tjá sig um hvort staðurinn við Gammel Kongevej væri sá síðasti. „Ég bara veit það ekki, ef það kæmi æðisleg staðsetning við Islandsbrygge þá er aldrei að vita. Maður á aldrei að hætta ef manni finnst eitthvað skemmtilegt.“ - fgg