Hafa þurft að hafna tilboðum

„Vesturport er ekki á neinn vonarvöl, síður en svo. En þetta er allt spurning um á hvaða stað við viljum vera,“ segir Gísli Örn Garðarsson, forsvarsmaður leikhópsins Vesturport.

Fréttablaðið greindi frá því á föstudag að menningar- og ferðamálaráð hefði tekið fyrir erindi frá Vesturporti þar sem þess er farið á leit við Reykjavíkurborg að hún semji við leikhópinn til þriggja ára og myndi samningurinn hljóða upp á 6-8 milljónir. Gísli, sem var staddur í London þegar Fréttablaðið náði í hann, segir að það sé hefð fyrir slíkum þriggja ára styrk hjá Reykjavíkurborg, hann hafi hins vegar ekki verið veittur í dágóðan tíma. „Svona samningur eða styrkur myndi hjálpa okkur stórvægilega við að hafa starfið skipulagðara. Okkur standa mörg flott tækifæri til boða en við höfum líka þurft að hafna mörgum góðum tilboðum.“

Gísli bætir því við að fjölmörg leikhús hafi sýnt því áhuga að vinna með Vesturporti eftir að leikhópurinn hlaut evrópsku leiklistarverðlaunin, Þá hafi starfsemi Vesturports einnig opnað dyr hjá mörgum íslenskum leikurum og listamönnum. Og er þá nærtækast að líta til þeirrar sýningar sem Gísli leikstýrir um þessar mundir í London í Royal Shakespeare-leikhúsinu; Ólafur Darri leikur í sýningunni, Selma Björnsdóttir er aðstoðarleikstjóri, Högni Egilsson sér um tónlistina og Börkur Jónsson er leikmyndahönnuðurinn.- fgg