Diaz og Lopez engar vinkonur

Leikkonurnar Jennifer Lopez og Cameron Diaz fara báðar með hlutverk í kvikmyndinni What to Expect When You're Expecting og að sögn heimildarmanna andar köldu á milli leikkvennanna.

„Þeim líkar ekki við hvor aðra og reyna að halda sig fjarri, en maður finnur vel fyrir þeirri spennu sem ríkir á milli þeirra," var haft eftir innanbúðarmanni, sem segir stærð föruneytis Lopez fara í taugarnar á Diaz. Móðir Lopez er með henni í för auk þriggja aðstoðarmanneskja, förðunarfræðings, hárgreiðslukonu og umboðsmanns og þykir Diaz víst nóg um.

Diaz mun heldur ekki þykja mikið til leiklistarhæfileika Lopez koma. „Hún sagði að Jennifer ætti margt eftir ólært og að hún ætti heldur að halda sig við sönginn og dómarastarfið í American Idol. Jennifer virðist þó vera alveg sama um Cameron, hún talar ekki um hana eða við hana heldur lætur eins og hún sé ekki til."