Forvitnileg stripparamynd

Steven Soderbergh er þekktur fyrir að feta ótroðnar slóðir þegar kemur að kvikmyndagerð og víst er að næsta kvikmynd hans, Magic Mike, á eftir að vekja mikla athygli. Hún fjallar um karlkyns strippara og líf hans á Flórída. Myndin verður að hluta til byggð á lífsreynslu bandaríska leikarans Channing Tatum, sem var strippari í Flórída áður en Hollywood uppgötvaði hann.

Tatum mun sjálfur leika aðalhlutverkið; hann er strippari sem kennir ungum lærlingi hvernig á að stíga réttu sporin og dilla rassinum og takast á við athyglina utan sviðsins. Lærlingurinn verður að öllum líkindum leikinn af ungstirninu Alex Pettyfer og þá hefur heyrst að Matthew McConaughey, sem er ber að ofan í svo til öllum myndunum sínum, muni leika strípibúllueigandann Dallas.

McConaughey er reyndar upptekinn maður; hann leikur aðalhlutverkið í spennutryllinum The Paperboy eftir Lee Daniels en meðal mótleikara hans í þeirri mynd eru Zac Efron og Nicole Kidman. Þá er hann einnig í stóru hlutverk í myndinni Mud á móti Reese Witherspoon eftir leikstjórann Jeff Nichols.