Leikkonur hlaupa til góðs

„Ég er í fínu formi,“ segir leikkonan Nína Dögg Filippusdóttir. Leikkonurnar Nína Dögg, Unnur Ösp Stefánsdóttir og Selma Björnsdóttir undirbúa sig nú fyrir Reykjavíkurmaraþonið sem fer fram 20. ágúst. Þær ætla að hlaupa 10 kílómetra til styrktar Unicef. Áheitin sem þær, og allir sem hlaupa fyrir Unicef, safna renna til neyðarsöfnunarinnar í Austur-Afríku.

„Ég ætla að styrkja gott málefni. Það þarf eitthvað að gerast í þessum heimi,“ segir Nína Dögg. „Það er náttúrulega fáránlegt að það séu sveltandi börn í Afríku á meðan maður lifir í vellystingum hérna heima. Óskiljanlegt.“ Nína Dögg hefur áður tekið þátt í Reykjavíkurmaraþoninu, en hleypur þó örlítið hægar nú þar sem hún á von á barni.

Er ekkert erfitt að hlaupa fyrir tvo?

„Nei, er maður ekki að hlaupa fyrir miklu fleiri? Ég ætla ekki að fara mér að voða, en ætla að léttskokka þetta. Ég hef einu sinni hlaupið 10 kílómetra áður og það gekk mjög vel. Ég náði góðum tíma, en ég stórefast um að tíminn verði sá sami núna. Enda er ég ekki að keppa við tímann.“ - afb