Svar við bréfi Helgu á svið

„Þetta verður ekki og er ekki búið að vera auðvelt verk, en það er heldur ekkert endilega þannig sem það á að vera," segir Ólafur Egilsson, sem vinnur nú að leikgerð eftir metsölubókinni Svar við bréfi Helgu, eftir Bergsvein Birgisson.

Svar við bréfi Helgu fer á svið Borgarleikhússins í vetur. Bókin kom út fyrir síðustu jól og seldist í um 8.000 eintökum. Hún var tilnefnd til Íslensku bókmenntaverðlaunanna í fyrra og valin besta skáldsaga ársins að mati bóksala. Leikstjóri er Kristín Eysteinsdóttir og á meðal leikara eru Þröstur Leó Gunnarsson, Ilmur Kristjánsdóttir og Sigrún Edda Björnsdóttir.

Ólafur segir jákvætt að bókin sé lesendum í fersku minni þegar verkið fer á svið, en sá Ólafur bókina fyrir sér á sviði þegar hann las hana fyrst?

„Já og nei. Sagan er falleg, en það eru miklar myndlýsingar sem flytjast ekki beinlínis yfir á sviðið sem slíkar. Ég hikaði alveg. Það er kannski ekkert óeðlilegt. Ég hika alltaf og efast. Maður er í stöðugum efa og þetta eru endalaus helvítis vandræði." Ólafur segir ekki sjálfgefið hvernig á að sviðsetja verkið, en bætir við að í leikhúsinu séu til ýmis góð meðul og tæki sem hægt er að grípa til.

Svar við bréfi Helgu er á köflum erótísk, en Ólafur segir þó að ekkert kynlíf verði á sviðinu. „Kynlífið verður túlkað á listrænan hátt. Það er hægt að ýja að og gefa í skyn á hátt sem heldur áhuga án þess að fólki finnist gengið fram af því. Þá heitir það kannski ekki kynlíf, frekar erótík. Það er mikil náttúra í bókinni og henni verður að koma til skila."

Ólafur þarf ekki aðeins að koma náttúrunni í Svari við bréfi Helgu til skila, heldur einnig ónáttúru.

„Já. Hann er aðframkominn af ástleysi og hjartasárum. Leitar huggunar í sínum skepnum. En ekki bara með holdlegum hætti, heldur andlegum fyrst og fremst."

atlifannar@frettabladid.is