Lohan meinaður aðgangur baksviðs

Vandræðagemlingurinn Lindsay Lohan eyddi allri síðustu helgi í að elta bassaleikara Coldplay, Guy Berryman, á röndum. Lohan hefur, að sögn slúðurmiðla vestanhafs, fengið augastað á bassaleikaranum og eyddi allri helginni í að flakka á milli tónleika í Chicago með systur sinni Ali.

Á laugardaginn var sást Lohan skælbrosandi á fremsta bekk á tónleikum og skrifaði ástarjátningar til sveitarinnar á Twitter í kjölfarið. Eftir tónleikana minnkaði hins vegar ánægja leikkonunnar með sveitina þegar henni var meinaður aðgangur baksviðs. Eftir að hún frétti að stallsystur hennar, Kate Bosworth og Gwyneth Paltrow, eiginkona Chris Martin söngvara Coldplay, hefðu komist baksviðs varð hún alveg brjáluð út í dyraverðina og rauk á dyr.