Scarlett Johansson afþakkaði stefnumót

Hálfgert æði hefur gripið um sig meðal bandarískra hermanna undanfarnar vikur eftir að einn þeirra varð sér úti um stefnumót með leikkonunni Milu Kunis. Fjöldi hermanna hefur fetað í fótspor hins heppna dáta og boðið ýmsum stjörnum á árlegt ball hermanna og nú síðast fékk Scarlett Johansson slíkt boð.

Hermaðurinn Dustin Williams bjó til lítið myndband sem hann setti á vefsíðuna Youtube og óskaði eftir því að fara á ballið með Scarlett Johansson. Leikkona var þó upptekin við tökur og afþakkaði boðið en sendi Williams kassa af kampavíni í sárabætur. „Það er mér mikill heiður að hafa fengið boð á ballið. Williams á skilið hrós fyrir starf sitt í þágu Bandaríkjanna og fyrir hið skemmtilega myndband. Ég verð þó að afþakka þetta góða boð vegna vinnu,“ skrifaði Johansson meðal annars í bréfi til hermannsins.

Justin Timberlake mun þó sækja ballið líkt og Mila Kunis auk þess sem Terminator-leikkonan, Linda Hamilton, bauðst til þess að fara á ballið í stað Betty White.