Öskumyndband fær athygli

Tónlistarmyndband hljómsveitarinnar Vigra hefur vakið athygli erlendis. Það var tekið upp við rætur Eyjafjallajökuls síðasta sumar. Tónlistarmyndband íslensku hljómsveitarinnar Vigra við lagið Sleep hefur hlotið þó nokkra athygli að undanförnu en það var tekið upp við rætur Eyjafjallajökuls þegar öskufokið þaðan stóð sem hæst síðasta sumar.

„Við vorum búnir að heyra að það væri mikið í gangi undir Eyjafjöllum með öskuna og ákváðum að taka sénsinn," segir Bjarki Pjetursson, liðsmaður Vigra. „Við vissum ekkert hvað við vorum að fara út í en það skilaði sér."

Myndbandið, sem Ragnar Snorrason leikstýrði, hefur verið tilnefnt til verðlauna á sjálfstæðu evrópsku kvikmyndahátíðinni ÉCU sem fer fram í París 1.-3. apríl. Það hefur áður verið sýnt á íslensku kvikmyndahátíðinni Northern Wave og var tilnefnt til verðlauna á Tónlistarmyndbandahátíð Los Angeles sem var haldin í janúar.

Myndbandið er byggt á Biblíusögunni um Abraham þar sem Guð bað hann um að fórna því dýrmætasta sem hann átti. Valdimar Örn Flygenring og Tómas Halldórsson léku feðga í myndbandinu. „Við hlupum með þá inn í bíl á milli taka. Þetta var mjög skrýtið allt saman," segir Bjarki og á þar við öskufallið á tökustaðnum.

Hljómsveitin Vigri er nefnd eftir togaranum þar sem afi Ragnars, og Hans bróður hans sem er einnig í hljómsveitinni, var skipstjóri. Hún leggur nú lokahönd á sína fyrstu plötu, Pink Boats, sem er væntanleg í vor. Hún var tekin upp í litlum kirkjum úti á landi, þar á meðal í Flateyjarkirkju. „Það er mikil stemning í þessum litlu kirkjum og við vorum að reyna að ná henni inn í upptökurnar," segir Bjarki.

freyr@frettabladid.is