Owen Wilson drekkur burt sorgir sínar

Vinir leikarans Owen Wilson óttast um heilsu hans eftir sambandsslit hans við barnsmóður sína. Wilson ku vera mjög niðurdreginn og hefur leitað sér huggunar í faðmi Bakkusar.

Nýverið sást Wilson á ölhúsi í Kaliforníu og þótti hann áberandi drukkinn. „Hann gat varla talað, hann var svo fullur. Hann kynnti sig fyrir hverri einustu stúlku inni á staðnum, sumum heilsaði hann aftur og aftur," var haft eftir einum fastagesti ölstofunnar. „Hann kemur hingað mjög reglulega og situr alltaf einn við barborðið og drekkur. Hann drekkur sig alltaf fullan, alveg sama hvaða vikudagur er."

Fjölmiðlar hið vestra hafa mikið velt sér upp úr sambandsslitum Wilsons og Jade Duell og telja sumir að hann hafi endað sambandið eftir að upp komst að hann er ekki faðir barnsins. Ekkert af þessu hefur þó verið staðfest.