Lára í garðpartíi

Laugavegurinn verður opnaður sem göngugata í dag og af því tilefni munu verslunin Spúútnik og skemmtistaðurinn Dillon halda heljarinnar garðpartí í Dillon-garðinum yfir helgina. Skemmtiatriði verða fyrir alla fjölskylduna; tónleikar, trúðar, andlitsmálning, eldgleypir og grillaðar pylsur.

Tónleikadagskráin hefst klukkan fjögur í dag og lýkur ekki fyrr en á miðnætti. Tónleikarnir verða þó ekki allir utandyra heldur færist gleðskapurinn inn á Dillon um tíuleytið. Dagskrá laugardagsins hefst klukkan þrjú og stendur til klukkan sex. Meðal þeirra sem koma fram á morgun eru Haffi Haff, Lára og hljómsveitin Sykur auk fjölda annarra listamanna.

Þess má geta að 40% afsláttur verður í Spúútnik á Laugavegi umrædda helgi og sérstakt tilboð á blómakjólum svo hægt verði að skarta sínu fegursta í garðveislunni.- hþt