Skiptir þú um gæja eins oft og naríur?

Paris Hilton er einhleyp á ný. Paris og kærastinn fyrrverandi, Cy Waits, sem skoða má í myndasafni, ákváðu í sameiningu að enda eins árs samband þeirra eftir að hafa átt í erfiðleikum í sambandinu undanfarið.

„Þau eru hætt saman. Það er mjög leiðinlegt því henni þykir mjög vænt um hann og finnst hann frábær náungi en þau lentu í erfiðleikum," sagði heimildarmaður við slúðurtímaritið US Weekly. Undanfarið hafa staðið yfir tökur á nýjasta raunveruleikaþætti Hilton, en kærastinn fyrrverandi var allt annað en ánægður með þáttinn.

„Cy var ekki ánægður. Honum fannst að það væri rýnt of mikið inn í einkalíf þeirra Parisar. Hann átti alls ekki von á því að myndavélarnar yrðu svona mikið fyrir þeim," sagði annar heimildarmaður.

Önnur ástæða sambandsslitanna er sú að Cy þótti frægðarljómi kærustunnar skyggja á sinn eigin ljóma, en hann er þekktur kaupsýslumaður og næturklúbbaeigandi í Las Vegas.