Ráðherra fagnar risamynd

Katrín Júlíusdóttir iðnaðarráðherra segir komu Ridley Scott verulega góðar fréttir fyrir Ísland. Hún vill líka horfa til indverska kvikmyndaiðnaðarins í Bollywood enda hafi hann mikil áhrif á ferðamannastraum frá næstfjölmennasta landi heims.

Fréttablaðið greindi frá því á miðvikudag að gengið hefði verið frá því að hluti úr stórmynd Ridley Scott, Prometheus, yrði tekinn upp hér á landi. Meðal þeirra stórstjarna sem koma til landsins eru Óskarsverðlaunaleikkonan Charlize Theron og ástralski stórleikarinn Guy Pearce.

Katrín Júlíusdóttir iðnaðarráðherra er mjög ánægð með heimsókn Ridley Scott og tökuliðs hans. „Ísland er enda mjög áhugaverður staður og það er mjög gaman þegar svona stórmynd kemur til Íslands því það vekur athygli á landinu sem tökustað og skilur eftir verðmæti í þjóðarbúinu.“ Katrín segir að iðnaðarráðuneytið hafi reynt að styðja við þennan iðnað. „Við gerum allt sem við getum fyrir þessa aðila; þetta er atvinnu- og verðmætasköpun auk þess sem þessu fylgir mikil landkynning.“

Katrín bendir jafnframt á að rekin hafi verið mikil landkynning á Íslandi gegnum verkefnið Film in Iceland og slíkt geti skipt sköpum. „Þetta er mjög spennandi því svona verkefni skila sér út í ferðamannageirann hér á landi, fólk sér landið á hvíta tjaldinu og vill koma hingað. Og við höfum verið að horfa til fleiri átta eins og Bollywood, því þar er beint samband milli kvikmyndageirans og ferðamannastraumsins.“

Kvikmyndagerðarmenn sem hingað koma fá tuttugu prósenta endurgreiðslu á framleiðslukostnaði hér og segir Katrín að Ísland verði að standa jafnfætis öðrum þjóðum á þeim grundvelli. Lög um endurgreiðslu verða endurskoðuð á þessu ári og segir Katrín vel koma til greina að gerðar verði einhverjar breytingar til að opna Ísland enn frekar. „Við munum gera allt sem við getum fyrir þessa aðila.“

freyrgigja@frettabladid.is