Hætta að selja hrossapylsur fyrir Morrissey

Belgísk tónlistarhátíð sem er fræg fyrir hrossakjötspylsur hyggst hætta sölu á pylsunum í einn dag til að geðjast tónlistarmanninum Morrissey.

Tónlistarhátíðin Lokerse Feesten gerir það til að gulltryggja að hinn sérvitri Morrissey komi fram á hátíðinni, en hann er harður baráttumaður gegn kjötáti. Frægt var þegar hann gekk af sviði Coachella-hátíðarinnar árið 2009 þegar hann fann lykt af grilluðu kjöti. Hann steig reyndar aftur á svið skömmu síðar, en tilkynnti þá að hann óskaði þess að fólk væri á grillinu en ekki dýr.

Lokerse Feesten hefst í byrjun ágúst og stendur í tíu daga og telja skipuleggjendur að það borgi sig að hætta kjötsölu daginn sem Morrissey kemur fram, þrátt fyrir að forsprakkarnir stæri sig af góðu úrvali af pylsum og sniglum á vefsíðu hátíðarinnar. Aðeins grænmetisréttir verða því í boði á hátíðinni 4. ágúst, daginn sem Morrissey stígur á svið.